ಬದುಕು ಮಾಯೆ ಎಂದವರೆಲ್ಲ,
ಕಾವಿ ತೊಟ್ಟು
ಗಡ್ಡ ಬಿಟ್ಟು
ಕೈ ಎತ್ತಿದವರೆಲ್ಲ,
ಮೀಡಿಯಾದ ಕೈಗೆ ಸಿಕ್ಕಿ
ನಂದುವ ದೀಪದಂತೆ
ಜೋರಾಗಿ ಉರಿವಂತೆ
ಸುದ್ದಿಯಾಗಿ ಮಾಯವಾದರು.
ಆದಿಯ ಅರಿವು ಇಲ್ಲದೇ
ಅಂತ್ಯ ತನ್ನಿಷ್ಟದಂತೆಯೇ ಎಂದು
ಕಾದಿ ತೊಟ್ಟು
ಲಜ್ಜೆ ಬಿಟ್ಟು
ಗದ್ದುಗೆ ಏರಿ ಕುಂತ ಕಮಂಗಿಗಳೆಲ್ಲಾ
ಅವರವರದೇ ಗಾಳದಲ್ಲಿ ಸಿಕ್ಕಿ
ಜೈಲ ಕೋಣೆಯಲ್ಲಿ ವಿಲಿವಿಲಿಯಾಗಿ
ಗೋಡೆಗೆ ಬೆನ್ನ ಚಾಚಿದರು.
ಪ್ರೀತಿ ಮಾತಾಡಲು ಟೈಮೇ ಇಲ್ಲದೇ
ಪ್ರೀತಿ ಜಾಗದಲ್ಲಿ ಹಣ ಇಟ್ಟು
ಕರಿ ಕೋಟು ತೊಟ್ಟು
ಏಸಿಯಲ್ಲಿ ಕುಳಿತೂ
ಬೆವರು ಒರೆಸುತ್ತಾ ಹೊರಟ
ಪಕ್ಕಾ ಬಿಸಿನೆಸ್ ಮಂದಿ
ಒಂದು ರಾತ್ರಿಯೂ ನಿದ್ರೆಯಿಲ್ಲದೇ
ಹೊರಳಾಡಿ ಹೊರಳಾಡಿ
ಗುಂಡಿ ಸೇರಿದರು.
